मनहरी । मनहरी गाउँपालिका वडा नं ८ बेलुवास्थित खेल मैदानमा जारी मनहरी खेलकुद तथा ब्यापार महोत्सव २०८१ मा नेपाली लोकदोहोरीका बादशाह भनेर चिनिएका चर्चित गायक राजु परियारले दर्शक नचाएका छन् ।
उनका मर्मस्पर्शी र नाच्नलायक थुप्रै गीतहरुमा दर्शक दीर्घामा मात्र नभएर स्टेज र स्टेज वरपर दर्शकहरु बेपरबाह नाचिरहेका देखिन्थे ।
साँझ अबेर मात्र स्टेज चढेका परियारले ‘कति राम्री है, मगरकी छोरी, बाटूम् क्या हो मायाको डोरी’ भन्दै सबै उमेर समूहका दर्शकहरुलाई नचाउन सफल भएका थिए ।
उनले ‘कोदो रोप्दा लाएको पिरती छुट्यो तोरी फुल्ने बेलामा’, ‘रुमाल धोको छु, त्यो खोलीको पानी कोही नखानू मैले छोको छु’, ‘जानेलाई जान देऊ माया’ लगायत गीतहरु प्रस्तुत गरेका थिए । उनको प्रस्तुति हेर्नका लागि पाका उमेर समूहका दर्शकहरुको समेत ओइरो लागेको छ ।
परियारसँगै मंगलबार रेश्मा पुन, पार्वती लोहनी, बाबु थिङ लगायत गायक गायिकाहरुको प्रस्तुति रहेको थियो । आस्था कला केन्द्रले नृत्यका सबै प्रस्तुतिहरु महोत्सवमा प्रदर्शन गरिरहेको छ ।
फागुन २८ गते बुधवारका दिन चर्चित लोकदोहोरी तथा काठे भाकाका गायिका प्रतिमा अर्याल, प्रकाश तितुङ लगायत गायक गायिकाको प्रस्तुति रहने आयोजकले जानकारी दिएको छ ।
फागुन २१ गतेदेखि सुरु भएको महोत्सव चैत ४ गतेसम्म सञ्चालन हुनेछ । महोत्सवमा चर्चित कलाकार दुर्गेश थापा, विश्व दोङ, उर्गेन दोङ, एलिना चौहान, प्रियंका कार्की लगायतका कलाकारहरु महोत्सवमा आउने आयोजकले जनाएको छ ।
